Last Updated:
Donald Trump: ఉక్రెయిన్‌పై రష్యా దాడిని నిరసిస్తూ మాస్కోపై మరింత కఠినమైన ఆంక్షలు విధించే చట్టంపై సంతకం చేసిన కొద్ది వారాలకే, అమెరికా అధ్యక్షుడు డొనాల్డ్ ట్రంప్ అనూహ్య నిర్ణయం తీసుకున్నారు.
రష్యాపై విధించిన పలు ఆర్థిక ఆంక్షలు, వాణిజ్య పరిమితులు, దిగుమతి సుంకాలను రద్దు చేస్తూ ఉత్తర్వులు జారీ చేశారు. నవంబర్ 3న జరగనున్న మధ్యంతర ఎన్నికల (Midterm Elections) నేపథ్యంలో అమెరికాలో రికార్డు స్థాయికి చేరిన డీజిల్ ధరలను తగ్గించే లక్ష్యంతో పాటు, రష్యా నుంచి ఇంధనాన్ని కొనుగోలు చేస్తున్న భారత్ వంటి దేశాలపై ఉన్న ఒత్తిడిని కొంతమేర తగ్గించే ఉద్దేశంతో ట్రంప్ యంత్రాంగం ఈ అడుగు వేసింది.
శనివారం జారీ చేసిన ఎగ్జిక్యూటివ్ ఆర్డర్‌లో.. ‘లిండ్సే ఓ. గ్రాహం సాంక్షనింగ్ రష్యా అండ్ ఇరాన్ యాక్ట్ ఆఫ్ 2026’ చట్టంలోని నిబంధనలను ట్రంప్ ఉపయోగించారు. జాతీయ ప్రయోజనాల దృష్ట్యా ఆంక్షలను ఎత్తివేసేందుకు అమెరికా అధ్యక్షుడికి ఈ చట్టం ప్రత్యేక అధికారాలను కల్పిస్తోంది. ఈ నిర్ణయానికి గల ప్రాతిపదికను వివరిస్తూ కాంగ్రెస్‌కు అవసరమైన సర్టిఫికేషన్, నివేదికను సమర్పించినట్లు ఆయన తెలిపారు. ఈ ఉత్తర్వుల ద్వారా చట్టంలోని సెక్షన్లు 112, 113 పరిధిలోని సుంకాలు, సెక్షన్ 102(d) కింద ఉన్న ఆంక్షలు, విదేశీ వ్యక్తులు, సంస్థలపై ఉన్న పలు నిబంధనల నుంచి పూర్తి మినహాయింపు లభించింది. తదుపరి చర్యలు అవసరమని అధ్యక్షుడు లేదా విదేశాంగ మంత్రి నిర్ణయించేంత వరకు ఈ వెసులుబాట్లు అమల్లో ఉంటాయి.
రష్యా అధ్యక్షుడు వ్లాదిమిర్ పుతిన్‌తో జరిపిన చర్చలు ‘అత్యంత విజయవంతమయ్యాయి’ అని ప్రకటించిన తర్వాత ట్రంప్ ఈ నిర్ణయం వెల్లడించారు. అమెరికా రష్యా నుంచి నేరుగా డీజిల్‌ను కొనుగోలు చేయనున్నట్లు స్పష్టం చేశారు. వెంటనే 3 లక్షల టన్నులకు పైగా డీజిల్‌ను సరఫరా చేసేందుకు మాస్కో అంగీకరించిందని, నవంబర్ మరియు ఆ తర్వాతి నెలల్లో మరిన్ని రవాణాలు ఉంటాయని పేర్కొన్నారు.
“హార్ముజ్ జలసంధిపై మా పూర్తి నియంత్రణ, అలాగే రష్యన్ ఇంధనంపై తీసుకున్న ఈ గొప్ప నిర్ణయంతో అమెరికన్లకు మాత్రమే కాకుండా ప్రపంచవ్యాప్తంగా డీజిల్ ధరలు రికార్డు స్థాయిలో, వేగంగా తగ్గుతాయి” అని ట్రంప్ తన ‘ట్రూత్ సోషల్’ ఖాతాలో పోస్ట్ చేశారు. ముఖ్యంగా రైతులు, పశువుల పెంపకందారులు, ట్రక్కర్లకు ఇంధన ఖర్చులను తగ్గించడమే తన ప్రధాన ప్రాధాన్యత అని ట్రంప్ వివరించారు.
రష్యా నుంచి ముడి చమురు కొనుగోళ్లను తగ్గించుకోవాలని న్యూఢిల్లీపై వాషింగ్టన్ నిరంతరం ఒత్తిడి తెస్తున్న నేపథ్యంలో ఈ నిర్ణయం ప్రాధాన్యత సంతరించుకుంది. రష్యాతో ఇంధన సంబంధాలను తగ్గించుకునేందుకు ట్రంప్ యంత్రాంగం గతంలో భారత్‌కు టారిఫ్ (సుంకాల) హెచ్చరికలు కూడా జారీ చేసింది. తాజా సడలింపుల ద్వారా రష్యన్ ఇంధన వాణిజ్యంపై ఆంక్షలు తగ్గడం వల్ల భారత్ తన ఇంధన అవసరాలను తీర్చుకోవడానికి, అలాగే అమెరికా వాణిజ్య జరిమానాల ముప్పును తప్పించుకోవడానికి మరింత వెసులుబాటు లభించే అవకాశం ఉంది. అయితే, భారత్‌ను ఉద్దేశించి విధించిన అన్ని టారిఫ్‌లు లేదా వాణిజ్య చర్యలను పూర్తిగా ఉపసంహరించుకున్నట్లు ఈ మినహాయింపులు నేరుగా ధ్రువీకరించడం లేదు.
రష్యన్ ఉత్పత్తులపై 500% వరకు అదనపు సుంకాలు, అలాగే రష్యన్ ఇంధనాన్ని దిగుమతి చేసుకునే లేదా ఆంక్షల ఉల్లంఘనకు సహకరించే సంస్థలపై 100% సుంకాలు విధించే అవకాశం ఈ చట్టంలో ఉంది. ఈ క్రమంలో వివిధ దేశాలు కొనుగోలు చేస్తున్న రష్యన్ క్రూడ్ ఆయిల్, సహజవాయువు లావాదేవీలను పర్యవేక్షించి తనకు నివేదిక సమర్పించాలని అమెరికా వాణిజ్య ప్రతినిధికి (USTR) ట్రంప్ ఆదేశాలు జారీ చేశారు.
నవంబర్ 3న జరగనున్న మధ్యంతర ఎన్నికల ముందు డీజిల్ ధరలు విపరీతంగా పెరగడం ట్రంప్ ప్రభుత్వానికి రాజకీయంగా పెద్ద తలనొప్పిగా మారింది. సెప్టెంబర్ నెలలో గ్యాలన్ డీజిల్ ధర రికార్డు స్థాయిలో 6.52 డాలర్లకు చేరగా, శుక్రవారం నాటికి 6.28 డాలర్ల వద్ద కొనసాగుతోంది. ఈ భారీ ధరలు రవాణా, వ్యవసాయ రంగాలపై పెను భారం మోపి మొత్తం సరఫరా వ్యవస్థలో ద్రవ్యోల్బణాన్ని పెంచే ప్రమాదం ఏర్పడింది. దీనిని అధిగమించేందుకే రష్యా నుంచి డీజిల్ కొనుగోలుతో ధరలను అదుపులోకి తేవాలని ట్రంప్ ప్రణాళిక రచించారు.
