Last Updated:
ప్రధాని మోదీ దివంగత తండ్రిని ఉద్దేశించి కాంగ్రెస్ జాతీయ అధ్యక్షుడు మల్లికార్జున ఖర్గే చేసిన అనుచిత వ్యాఖ్యలు రాజకీయ దుమారం రేపాయి. కాంగ్రెస్ వైఖరిపై బీజేపీ అగ్రనేతలు తీవ్రస్థాయిలో విరుచుకుపడ్డారు.
ప్రధానమంత్రి నరేంద్ర మోదీపై కాంగ్రెస్ జాతీయ అధ్యక్షుడు మల్లికార్జున ఖర్గే చేసిన వ్యాఖ్యలు జాతీయ రాజకీయాల్లో తీవ్ర దుమారం రేపుతున్నాయి. బిహార్ మొదటి ముఖ్యమంత్రి శ్రీకృష్ణ సింగ్ 139వ జయంతి సందర్భంగా ఆదివారం పాట్నాలో నిర్వహించిన సభలో ఖర్గే తీవ్ర అభ్యంతరకర పదజాలం ఉపయోగించారు. మోదీ ఎక్కడికీ వెళ్లరని సభలో ఒక వ్యక్తి అనగా, దానికి బదులిస్తూ ‘మోదీ తండ్రి కూడా దిగిపోవాల్సిందే’ అంటూ రెండుసార్లు ఘాటుగా వ్యాఖ్యానించారు. మోదీ దివంగత తండ్రిని వివాదంలోకి లాగడంపై భారతీయ జనతా పార్టీ నాయకులు నిప్పులు చెరిగారు.
దేశ ప్రధానిపై ఇలాంటి అసభ్యకర, అసెంబ్లీ సంప్రదాయాలకు విరుద్ధమైన భాష వాడటం కాంగ్రెస్ పార్టీ నైతిక, సిద్ధాంత దివాళాకోరుతనానికి నిదర్శనమని బీజేపీ నాయకత్వం ధ్వజమెత్తింది. అభివృద్ధిపై మాట్లాడేందుకు ఏమీ లేకనే విపక్షాలు వ్యక్తిగత దూషణలకు దిగుతున్నాయని బీజేపీ ఆరోపించింది.
కేంద్ర హోంమంత్రి అమిత్ షా స్పందిస్తూ కాంగ్రెస్ అధ్యక్షుడు రాజకీయ హుందాతనాన్ని పూర్తిగా కాలరాశారని మండిపడ్డారు. రాహుల్ గాంధీ నాయకత్వంలో కాంగ్రెస్ పార్టీ విధానపరమైన చర్చలను పక్కనపెట్టి కేవలం వ్యక్తిగత దూషణలు, నీచమైన భాష వాడటానికే ప్రాధాన్యం ఇస్తోందని దుయ్యబట్టారు. గతంలో కూడా మోదీ కుటుంబ సభ్యులపై ఇలాంటి దాడికి తెగబడ్డారని గుర్తుచేశారు. మరోవైపు బీజేపీ నేత నితిన్ నబీన్ సైతం స్పందిస్తూ, ప్రజా సమస్యలపై మాట్లాడేందుకు అర్హత లేని ప్రతిపక్షాలు కేవలం నిరాశ, నిస్పృహలతోనే దివంగత వ్యక్తుల పేర్లను రాజకీయాల్లోకి లాగుతున్నాయని ఆగ్రహం వ్యక్తం చేశారు.
आज पटना में कांग्रेस अध्यक्ष मल्लिकार्जुन खड़गे द्वारा देश के माननीय प्रधानमंत्री श्री नरेंद्र मोदी जी के प्रति जिस प्रकार की अमर्यादित और असंसदीय भाषा का प्रयोग किया गया है, वह कांग्रेस के वैचारिक दिवालियापन को दर्शाता है।
राजनीतिक विरोध की भी एक गरिमा होती है, लेकिन सार्वजनिक मंच से स्वर्गीय परिजनों को भाषणों में घसीटना ही अब राहुल गांधी और समूचे विपक्ष का असली ‘संस्कार’ बन चुका है। यह खड़गे जी का व्यक्तिगत बयान नहीं, बल्कि पूरी कांग्रेस की शिष्टाचार-विहीन सोच का प्रकटीकरण है।जब विपक्ष के पास देश के विकास, नीति और जनकल्याणकारी योजनाओं पर बहस करने के लिए कोई ठोस मुद्दा नहीं बचता, तो वे इसी प्रकार की हताशा और व्यक्तिगत आक्षेपों का सहारा लेते हैं।
देश की जनता इस अमर्यादित राजनीति को भली-भांति देख रही है और समय आने पर इसका करारा जवाब देगी।
— Nitin Nabin (@NitinNabin) October 25, 2026
పాట్నా సభలో ఎన్నికల అవకతవకలు, ఓటర్ల జాబితా ప్రత్యేక సవరణపై ఖర్గే ప్రసంగిస్తున్న సమయంలో సంతోష్ కుమార్ అనే వ్యక్తి లేచి మోదీ ఎక్కడికీ వెళ్లరంటూ నినదించారు. దీంతో ఆగ్రహించిన ఖర్గే ఆ వివాదాస్పద వ్యాఖ్యలు చేశారు. అనంతరం సభా ప్రాంగణంలో తీవ్ర గందరగోళం చెలరేగింది. సదరు వ్యక్తిపై అక్కడున్న కాంగ్రెస్ కార్యకర్తలు చేయి చేసుకుని హాల్ బయటకు నెట్టేశారు. బయటకు వచ్చిన తర్వాత ఆ వ్యక్తి మీడియాతో మాట్లాడుతూ, తిరుగుబాటు వస్తే తప్ప మోదీ దిగిపోరనే ఉద్దేశంతో తాను మాట్లాడానని, తన మాటలను పూర్తిగా వినకుండా తప్పుగా అర్థం చేసుకున్నారని వాపోయాడు.
కేంద్ర మంత్రి గిరిరాజ్ సింగ్ ఈ వ్యవహారంపై మాట్లాడుతూ కాంగ్రెస్ అధిష్టానంపై విమర్శనాస్త్రాలు సంధించారు. గతంలో రాహుల్ గాంధీ మాత్రమే ఇలాంటి అనుచిత వ్యాఖ్యలు చేసేవారని, ఇప్పుడు పార్టీ సీనియర్లంతా అదే బాటలో నడుస్తున్నారని ఎద్దేవా చేశారు. సెప్టెంబర్‌లో 76వ ఏట అడుగుపెట్టిన ప్రధాని నరేంద్ర మోదీ మరో 30 ఏళ్ల పాటు అధికారంలోనే కొనసాగుతారని ధీమా వ్యక్తం చేశారు. ఈవీఎంల బదులు బ్యాలెట్ పేపర్లతోనే ఎన్నికలు నిర్వహించాలని ఖర్గే డిమాండ్ చేయడం విడ్డూరంగా ఉందని బీజేపీ ప్రతినిధి తుహిన్ సిన్హా పేర్కొన్నారు.
దేశ ప్రధాని పదవి గౌరవానికి భంగం కలిగించేలా మాట్లాడిన ఖర్గే వెంటనే బహిరంగ క్షమాపణ చెప్పాలని బీజేపీ నేతలు డిమాండ్ చేస్తున్నారు. ఈ వ్యాఖ్యలకు నిరసనగా దేశవ్యాప్తంగా పెద్ద ఎత్తున నిరసన ప్రదర్శనలు చేపట్టేందుకు బీజేపీ ప్రణాళికలు రచిస్తోంది. రానున్న రోజుల్లో కాంగ్రెస్ కార్యాలయాల ఎదుట ధర్నాలు నిర్వహించి ప్రజాక్షేత్రంలోనే బుద్ధి చెబుతామని బీజేపీ వర్గాలు హెచ్చరించాయి. ఈ వివాదం రాబోయే రోజుల్లో పార్లమెంట్ వేదికగా మరింత రాజుకునే పరిస్థితులు కనిపిస్తున్నాయి.
