Last Updated:
ఫ్రాన్స్ హింసాకాండ.. అసలు ఎందుకు ఇలా జరుగుతోంది? దీని వెనుక ఉన్నది ఎవరు? ప్రపంచాన్ని కుదిపేస్తున్న తాజా రిపోర్ట్!
ఫ్రాన్స్ వీధుల్లో రగిలిన హింసాగ్ని వెనుక అసలు సూత్రధారులు ఎవరు? ప్రశాంతంగా ఉండే ఆ దేశాన్ని ఒక్కసారిగా అతలాకుతలం చేసిన అల్లర్ల వెనుక ఏదైనా భారీ కుట్ర దాగి ఉందా? ఇప్పుడు ప్రపంచ వ్యాప్తంగా ఇదే ప్రశ్న ప్రముఖంగా వినిపిస్తోంది. ఈ ఉత్కంఠభరిత ప్రశ్నలకు సమాధానంగా తాజాగా ఒక సంచలన నివేదిక వెలుగులోకి వచ్చి ప్రకంపనలు సృష్టిస్తోంది. ప్రముఖ వార్తా సంస్థ ఫాక్స్ న్యూస్ డిజిటల్ రూపొందించిన ప్రత్యేక రిపోర్ట్ ఫ్రాన్స్ అల్లర్ల వెనుక ఉన్న ఒక అదృశ్య అంతర్జాతీయ నెట్‌వర్క్‌ను బట్టబయలు చేసింది. ఏకంగా 54 సంస్థలు, వాటికి పరోక్షంగా మద్దతు ఇస్తున్న గ్లోబల్ నెట్‌వర్క్ ప్రమేయం ఇందులో ఉందని ఆ నివేదిక బల్లగుద్ది మరీ చెబుతోంది. ఈ నివేదికతో ఫ్రాన్స్ హింసాకాండ వెనుక ఉన్న తెరవెనుక రాజకీయాలు ఒక్కసారిగా ప్రపంచం దృష్టిని ఆకర్షించాయి.
ఫ్రాన్స్‌ను అక్షరాలా దహించివేసిన ఈ భారీ ఆందోళనల వెనుక వామపక్ష, కమ్యూనిస్టు, సోషలిస్టు సంస్థల హస్తం ఉన్నట్లు దర్యాప్తులో స్పష్టంగా తేలింది. వీటితో పాటుగా వివిధ దేశాలకు చెందిన విద్యార్థి సంఘాలు, కార్మిక పక్షపాతిగా చెప్పుకునే ట్రేడ్ యూనియన్లు, పాలస్తీనా అనుకూల మద్దతుదారులతో పాటు పలు అంతర్జాతీయ మీడియా సంస్థలు సైతం ఈ ఆందోళనల్లో భాగస్వాములయ్యాయి. అయితే ఆయా సంస్థలు నేరుగా హింసను ప్రేరేపించాయా లేదా కేవలం శాంతియుత నిరసనల్లో మాత్రమే పాల్గొన్నాయా అనే కోణంలో ఇంకా కచ్చితమైన స్పష్టత రావాల్సి ఉంది. నివేదికలో పేర్కొన్న ఆ 54 సంస్థలు దగ్గరుండి అల్లర్లను ప్రోత్సహించాయని కచ్చితంగా నిరూపించలేకపోయినా, ఈ హింసాత్మక ఆందోళనల్లో వారి ప్రమేయాన్ని మాత్రం ఎవరూ కొట్టిపారేయలేరు.
ఈ మొత్తం వ్యవహారంలో ప్రధానంగా భారతీయ మూలాలున్న వామపక్ష భావజాల రచయిత విజయ్ ప్రసాద్ పేరు ప్రముఖంగా వినిపిస్తుండటం తీవ్ర కలకలం రేపుతోంది. ఆయన ప్రస్తుతం ‘ట్రైకాంటినెంటల్’ అనే అంతర్జాతీయ సంస్థకు ఎగ్జిక్యూటివ్ డైరెక్టర్‌గా కీలక బాధ్యతలు నిర్వర్తిస్తున్నారు. షాంఘై కేంద్రంగా కార్యకలాపాలు సాగిస్తున్న అమెరికన్ వ్యాపారవేత్త నెవిల్ రాయ్ సింఘం నుంచి ఈ సంస్థకు భారీ స్థాయిలో ఆర్థిక సాయం అందుతోందని రిపోర్ట్ కుండబద్దలు కొట్టింది. ఫ్రాన్స్ ఆందోళనలు ఉధృతంగా ఉన్న సమయంలో విజయ్ ప్రసాద్ ఎక్స్ వేదికగా ‘పారిస్-న్యూఢిల్లీ-బ్యూనస్ ఎయిర్స్’ అంటూ చేసిన ఒక పోస్ట్ తీవ్ర వివాదాస్పదంగా మారింది. ప్రపంచవ్యాప్తంగా సాగుతున్న వివిధ ఉద్యమాలకు ఆయన నెట్‌వర్క్ మద్దతు పలుకుతోందని చెప్పడానికి ఫాక్స్ న్యూస్ ఈ పోస్ట్‌ను ఒక బలమైన ఉదాహరణగా చూపిస్తోంది.
ఫ్రాన్స్ కేంద్రంగా పని చేస్తున్న ‘ఇండియన్ అలయన్స్ పారిస్’ అనే భారతీయ కమ్యూనిటీ సంస్థ పేరు కూడా ఈ వివాదాస్పద జాబితాలో చేరడం అందరినీ విస్మయానికి గురిచేస్తోంది. సామాజిక మాధ్యమాల వేదికగా ఫ్రాన్స్, భారత్ దేశాల్లోని యువతను ఏకం చేసి ఉద్యమాలను మరింత ఉధృతం చేసేందుకు ఈ సంస్థ తెరవెనుక గట్టి ప్రయత్నాలు చేసినట్లు సమాచారం. పీపుల్స్ ఫోరమ్‌ సంస్థతో కలిసి ఒక ప్రత్యేక కార్యక్రమంలో ఈ ఆర్గనైజేషన్ భాగస్వామ్యం తీసుకున్నట్లు పలు ఆరోపణలు వినిపిస్తున్నాయి. వీటికి తోడు కోడ్‌పింక్, బ్రేక్‌త్రూ న్యూస్, ట్రైకాంటినెంటల్ లాంటి పలు సంస్థలు ఈ ఆందోళనలను అంతర్జాతీయ స్థాయిలో విస్తృతంగా ప్రచారం చేసి పరోక్షంగా ఉద్యమానికి మరింత ఆజ్యం పోశాయని ఈ రిపోర్ట్ స్పష్టం చేస్తోంది.
వాస్తవానికి దెబ్బతిన్న విద్యా వ్యవస్థ, అమాంతం పెరుగుతున్న ధరలు, ప్రభుత్వ ఏకపక్ష విధానాలకు వ్యతిరేకంగా ఫ్రాన్స్‌లో ఈ నిరసనలు మొదలయ్యాయి. ప్రముఖ రాయిటర్స్ వార్తా సంస్థ కథనం ప్రకారం లక్షలాది మంది సామాన్య ప్రజలు ఈ ఆందోళనల్లో పాల్గొనగా, పలుచోట్ల అవి తీవ్ర స్థాయికి చేరుకుని భారీ దహనకాండ, లూటీలకు దారితీశాయి. ఈ దారుణమైన అల్లర్లను కేవలం ఒక అంతర్జాతీయ వామపక్ష సంస్థల కుట్రగా మాత్రమే ఫాక్స్ న్యూస్ అభివర్ణిస్తోంది. అయితే ఒక నిరసనకు మద్దతు తెలపడం, సోషల్ మీడియాలో వీడియోలు షేర్ చేయడం లేదా ఆందోళనల్లో పాల్గొనడం మాత్రమే నేరుగా హింసకు దారితీసినట్లు ఎలాంటి పక్కా ఆధారాలు లేవని, దీనిపై లోతైన విచారణ జరగాలని పలువురు నిపుణులు తమ అభిప్రాయాలను వ్యక్తం చేస్తున్నారు.
