Last Updated:
PM Modi: గుజరాత్ ముఖ్యమంత్రిగా తొలిసారి ప్రమాణ స్వీకారం చేసి 25 ఏళ్లు పూర్తయిన సందర్భంగా ప్రధాని నరేంద్ర మోదీ తన సుదీర్ఘ ప్రయాణాన్ని గుర్తుచేసుకున్నారు.
బుధవారం నిర్వహించిన ఓ కార్యక్రమంలో ఆయన మాట్లాడుతూ.. తన ప్రయాణాన్ని తీర్చిదిద్దిన సంక్షోభాలు, రాజకీయ పోరాటాలు, ఎదురైన విమర్శలను నెమరువేసుకుంటూ, ప్రతి అనుభవం తనకు ఒక సరికొత్త పాఠాన్ని నేర్పిందని పేర్కొన్నారు. ప్రభుత్వ అధినేతగా పాతికేళ్ల ప్రయాణాన్ని పూర్తి చేసుకున్న సందర్భంగా ప్రధాని మాట్లాడుతూ.. నిరంతరం నేర్చుకోవాలనే తపనను కలిగి ఉండటమే తన జీవితంలో అత్యంత ముఖ్యమైన పాఠమని చెప్పారు. తన స్వగ్రామం వద్‌నగర్‌లోని పాఠశాల రోజులను గుర్తుచేసుకుంటూ.. “నేర్చుకోవాలనే ఆ ఆసక్తి నా జీవితంలో ఒక భాగమైపోయింది. ఇప్పటికీ నన్ను నేను ఒక విద్యార్థిగానే భావిస్తాను. ప్రతిరోజూ ఏదో ఒక కొత్త విషయాన్ని నేర్చుకోవడానికి ప్రయత్నిస్తుంటాను” అని తెలిపారు.
2001లో గుజరాత్ ముఖ్యమంత్రిగా బాధ్యతలు చేపట్టడానికి కొద్ది నెలల ముందే సంభవించిన భుజ్ భూకంపం తన రాజకీయ జీవితంలో తొలి, అత్యంత క్లిష్టమైన పరీక్షలలో ఒకటని ఆయన గుర్తుచేశారు. ఆ తీవ్ర విపత్తు ప్రభుత్వ దృష్టిని పునర్నిర్మాణం వైపు మళ్లించేలా చేసిందని, భారీ సవాలును సైతం అవకాశంగా ఎలా మలుచుకోవచ్చో నేర్పిందని గతంలోనూ ప్రధాని ప్రస్తావించారు. ప్రతికూల పరిస్థితులకు భయపడి వెనకడుగు వేయకుండా, వాటిని ధైర్యంగా ఎదుర్కోవాలనే కీలకమైన పాఠాన్ని ఆ అనుభవం నేర్పిందని వివరించారు.
ఆ తర్వాత కొన్నేళ్లకు కరోనా మహమ్మారి (కోవిడ్-19) సరికొత్త రూపంలో పెను సంక్షోభాన్ని సృష్టించిందని మోదీ పేర్కొన్నారు. ఇలాంటి సంక్షోభాలు బాధ్యతలను పెంచుతూనే, ఓర్పును నిరంతరం పరీక్షిస్తాయని చెప్పారు. “ప్రతి సంక్షోభం నా సహనాన్ని పరీక్షించింది, ప్రతి విజయం నా బాధ్యతలను మరింత విస్తరించింది, అలాగే ప్రతి ఘనత మరింత ఉన్నతమైన లక్ష్యాల దిశగా అడుగులు వేయడానికి నాకు ధైర్యాన్ని, సంకల్పాన్ని ఇచ్చింది” అని ప్రధాని స్పష్టం చేశారు.
తనతో విభేదించే వారిపై ప్రధాని మోదీ చేసిన వ్యాఖ్యలు ఈ కార్యక్రమంలో ప్రత్యేక ఆకర్షణగా నిలిచాయి. గత 25 ఏళ్ల రాజకీయ ప్రస్థానంలో ఎదురైన నిరసనలు, విమర్శలు, రాజకీయ వ్యతిరేకతను ప్రస్తావిస్తూ.. తనను సవాలు చేసిన వారు కూడా ఏదో ఒక రూపంలో తనకు గురువులేనని కొనియాడారు.
“నన్ను సమర్థించేవారు నాకు ఉత్సాహాన్ని, ప్రోత్సాహాన్ని ఇచ్చారు.. అదే సమయంలో నన్ను విమర్శించిన వారు ఆత్మపరిశీలన చేసుకోవడం నేర్పారు. అలాగే నన్ను వ్యతిరేకించిన వారు నాకు ప్రజాస్వామ్యపు అసలైన శక్తిని చూపించారు” అని ప్రధాని నరేంద్ర మోదీ పేర్కొన్నారు.
